داملالار

...sevgi bir körpüdür

سئوگی بیر کؤرپودور، بیر اینجه کؤرپو

آیاغین تیتره سه دوشرسن چایا

بو اؤلوم چایی دیر، اویونجاق دئییل

کیمسه ده یئتیشمز چکدییین هایا

حادی آل الینه بوش اللریمی

سن یوخ کی، سئوگیلیم من ییخیلارام

دوشرم بولانلیق چایین ایچینه

سن کیپریک چالینجا من یوخ اولارام

+آرتیردی 90/11/21ساعات21:16 داملا |

سایین اوخوجولار، بو یئنی بلوگدا تاریخ و تاریخ ایله ایلگیلی اولان یازیلاری اوخویا بیلرسینیز.

www.tariximiz.arzublog.com

+آرتیردی 90/11/17ساعات22:55 داملا |

...Yenə həmən baxış

یئنه همن باخیش، همن هؤووشنه!

یئنه همن قه هر بوغازیمدادیر

دیلیمی گؤینه دیر "سئویرم سنی"

هله دئمه دیییم سؤز آغزیمدادیر

باشلامادیغیمیز باشا چاتیبدیر

ایکی اورکلیییم باشا چاتماییب

بیری یاساقلاییر: آتیبدیر سنی

بیری آلقیشلاییر: هله آتماییب

گؤزومدن گؤزونه کؤرپو سالیرام

باخیشین آیاغی بیردن بورخولور

سینیر سینیق- سالخاق کؤرپوموز بیزیم

سؤزوم یاریمچیلیق گؤزلریم دولور

یئنه ده قییمیرام سنی اوزمه یه

اوره ییمده قالیر بوتون گیلئیلر

دایانما گئت اوغول! گئت گئج قالیبسان!

ایندی پئشمانلیغین دا منه نئیلر؟

+آرتیردی 90/08/28ساعات0:0 داملا |

اوچاق

^اوچاق

^{یاریلدی بولودلار گؤزله نیلمه دن}

^{ائندی توپراغیما یاسلی بیر اوچاق}

^{الندی باشینا گول قوجاق- قوجاق}

^{آلیشدی مین اورک، سؤندو بیر اوجاق}

^{آغاردی یای گونو سهندین باشی}

^{دوزولدو کیپرییه گؤزلرین یاشی}

^{دوشوندوم:}

^{دونیانین گؤزو دار ایمیش}

^{او گلن تبریزلی شهریار ایمیش}

"دوکتور علی داشقین"

+آرتیردی 90/06/22ساعات21:36 داملا |

Gözün aydın qara topraq

یاریمی آلدین الیمدن

گؤزون آیدین قارا توپراق

سن اوتوبسان، اوتوزان من

گؤزون آیدین قارا توپراق

یاریما سن اوتاق اولدون

اونا بیر سرت یاتاق اولدون

سؤزلرینه قولاق اولدون

گؤزون آیدین قارا توپراق

نئجه قییدین گولو دردین

اونو اؤز کؤنلونه سردین

دئیه سن آزالدی دردین

گؤزون آیدین قارا توپراق

ییرمی بئش یای- قیش اؤتوشدو

نیسگیل ایله درد قاتیشدی

دؤزمه دی گول یئره دوشدو

گؤزون آیدین قارا توپراق

ائلیمین نازلیسی سنده

دونیانین دردلری منده

ناز یاتیبدیر آغ کفنده

گؤزون آیدین قارا توپراق!

عزیز دوستوم ائلناز خانیم نستوه آذربایجانیمیزین گئنج شاعیری ۱۳۸۶- جی ایلین یاز فصیلینین سون گونونده عؤمرونون ۲۵-جی باهاریندا آیریلدی بیزدن. او، گئدیشی ایله یاز فصیلینی ده اؤزو ایله آپاردی، او ایل. نیسگیلی، اورکلری ائله یاخدی، ائله یاندیردی کی، هله ده توختاماییب گؤینرتیسی. اؤزو شعرینده دئمیشکن اؤلوم دامارلاریندا گزیردی اونون.

+آرتیردی 90/03/30ساعات22:58 داملا |

...kağızda yaşadı

کاغیذدا یاشادی بیزیم سئودامیز

هئچ زامان سسله نیب دیله گلمه دی

سطیرلرده چکدیک کدر یوکونو

نه چکدیییمیزی کیمسه بیلمه دی

دوداقلاریمیزدا کلفچه، قیفیل

بیز سوسدوق، ساده جه گؤزلر دانیشدی

هر گؤروش سونوندا آیریلیق سؤزون

تیتره یه- تیتره یه دیزلر دانیشدی

هئچ زامان سسله نیب دیله گلمه دیک

پولادا چئوریلدی دوداقلاریمیز

کاغیذلار دؤزمه دی بو سوسقونلوغا

هر زامان سیزلادی واراقلاریمیز

گؤرسه بوغولورام، دیلله نر دئیه

من سارالیغیمی آتدیم دنیزه

داشلار دیله گلدی، او دیللنمه دی

لال بالیقلار بئله گولدولر بیزه

+آرتیردی 90/02/08ساعات14:43 داملا |

+آرتیردی 90/01/03ساعات23:48 داملا |

Ən gizli sözləri

" دونیالیق آنا دیلی گونو قوتلو اولسون"

^{ان گیزلی سؤزلری}

^{باغلی دیلیمین اوجوندا اکمیشم}

^{آچیلسا بیر گون}

^{اؤنجه دانیشاجاق نه لر چکمیشم!}

"محمد علی نهاوندی(موغان)"

+آرتیردی 89/12/01ساعات18:53 داملا |

Günəş deyilmiş gözlərin

دوستوم "پریناز محمدی" دن بیر شعر:

گونش دئییلمیش گؤزلرین

یالقیزلیغیمین چرچیوه سیندن

زولاقلارین توپراغیما دوشنده جان آلمیشدیم

اوره ییم چیچک آچمیشدی

آنجاق

گونش دئییلمیش گؤزلرین

سانکی جیغیر دا یوخموش دویغولاریندا

کی، کئچه نمدیم اورییندن

دایاندیغیم یئرده قورودوم

داش اولدوم

منه ده چنسیز داغ دئدیلر

داریخسان منه ساری گل

سئوگین اولورسا دئش باغریمی

آنجاق گؤره جکسن

گونش دئییلمیش گؤزلرین

آلدانمیشدیم

اوره ییم چیچک آچمیشدی.

+آرتیردی 89/11/06ساعات20:50 داملا |

....Mənı xəzəl- xəzəl

Kuru ve Karanlık Ağaç

منی خزل- خزل سوووردو زامان

یوخسا یاشیل- یاشیل قالاردیم سنه

یاغمورا راسلاییب، قارا دوشردیم

آما پای اولمازدیم دومانا- چنه

قارغالار قولومدا یووا قوردولار

سنسیزجه یاشادیق من ده، قولوم دا

توپراغا تاخیلدی آیاغیم منیم

گزیب گؤرنمه دیم باری یولومدا

آجی نیسگیلینی سیندیرمک چتین!

گؤودم جادار- جادار، سو اولوب دا، آخ

ایچریم اوزولور، قابیغیم قوپور

ساچیم خزل- خزل، گونش اول دا، باخ

منیم دیلیم کیمی کسیله جک دیر

سنی بوداغیمدان قوپاران اللر

منیم ائلیم کیمی سورونه جکدیر

سنی توپراغیمدان آپاران سئللر

اؤگئیلیک حیسسی وار بوداقلاریمدا

منه بالتا- بالتا باخیب دورورلار

بو قیش قورویاجام باشدان دیبه دک

هامیسی بوشونا خیال قورورلار...

+آرتیردی 89/09/20ساعات22:31 داملا |

PAYIZDİR

Şəklə tam ölçüdə bax

پاییزدیر ، شاعیردیر، سئوگیدیر، سنسن

و پنجره میزین چیغیرتی سسی

بوتون وارلیغیمی تیتره دیر آنجاق

کیپریییندن اسن باهار نفسی

گئدیرسن اولورام بیر گؤی قورشاغی

تام سنین یوردوندان اؤز یوردوما دک

گؤیلرده سورونوب سنی تاپمادان

دؤنورم یوردوما دردلی دورنا تک

سنین اللرینی اؤزله ین زامان

سازاقلار سسینه یاتا بیلمیرم

نفسین اسمه دن بوش کوچه لرده

یازی پاییزیما قاتا بیلمیرم

سئوگین بیر اوموددور، قلبین مین اومود

مین سئودا قالخاجاق قلبیندن سنین

هانسی پنجره نی چیغیردیرسان سن؟

هانسی پاییزدادیر یاغیشین، چنین؟

+آرتیردی 89/08/04ساعات18:57 داملا |

...

^{ساعات زنگ چالدی}

^{مدرسه میز چوخ اوزاقدا}

^{کیفیمی گؤتوردوم}

^{دیلیم ائوده قالدی}

^{شعر: یونس صفدری}

+آرتیردی 89/07/01ساعات18:53 داملا |

Bir gün daha

بير گون داها

بير آي داها

زامان يئل كيمي اسير

حايات داوام ائله يير هله

....

آردی

+آرتیردی 89/06/06ساعات18:27 داملا |

... Məni yasaqlayib

^{منی یاساقلاییب بو یاساق سئوگی}

^{حبس ائدیبدیر منی اؤز اوتاغیمدا}

^{آتا دانلاغینین گؤیرتیلری}

^{هله چکیلمه ییب، باخ! قولاغیمدا}

^{قیفیللانمیش قاپی اؤنومده دوروب}

^{یالقیزلیق بورویوب دؤرد بیر یانیمی}

^{کاغیذ گؤتورورم سنه شعر یازام}

^{کلمه لر بیر به بیر آلیر جانیمی}

^{شعریمی یازاندا هئی دوشونورم}

^{بو یاساقلیقلاردان قورتولوم نئجه}

^{منی قورتارسانا قارا دوستاقدان}

^{یوخسا اؤله جه یم ائله بو گئجه.}

+آرتیردی 89/04/29ساعات21:13 داملا |

Laylalar

اوزاق ایللردن بری، آنالار اوشاقلارینا اولان سونسوز سئوگیلرینی لایلالار قالیبینده کؤرپه لرینه سؤیله میشلر. یوخ اولماق تهلوکه سینده اولان بو لایلالاری یاشاتماق بیزیم بورجوموزدور.

سونسوز فولکلور خزینه میزدن اولان بو گؤزل لایلالار کیچیجیک " آیهانا "سونولور.

لایلای دئدیم بویونجا ،

باش یاستیغا قویونجا ،

یات ، گولوم ، یاتاغیندا ،

باخیم سنه دویونجا.

آردی

+آرتیردی 89/03/15ساعات21:14 داملا |

...Saçımın telini

^{ساچیمین تئلینی تارینا باغلا}

^{بارماغیندان سوزدور سئویش نغمه سین}

^{گوجونون قده ری ساریل بوینوما}

^{دوداقلاریندا بوغ آیریلیق سسین}

^{قوللاریمدا دینجل جئیران بالاسی}

^{اووچو اللریمدن نه قاچ، نه چکین}

^{گؤزلریمدن اوخو سونسوز سئوگیمی}

^{شعره چکنمیرم ایچریمده کین}

+آرتیردی 89/01/18ساعات20:54 داملا |

یونوس ائمره

یونوس ائمره (میلادی1238-1320)

کؤچوروب دوزنله ین: زهرا نظرنژاد

یونوس ائمره آنادولودا تصوووف آخیمی نين و تورکجه شعرين اؤنچوسودور. اينسان سئوگيسينه دايانان بير گؤروشو گلیشدیرميشدير.

ياشامي قونوسوندا يئترلی بيلگی اولماديغی کیمی اونونلا ايلگيلی قايناقلاردا آنلاتيلانلار دا بير بيرينی توتماز. هارادا، هانسی ایلده آنادان اولدوغو کسينليکله بیلینمه ییر. کيمي قايناقلاردا آنادولويا دوغودان گلن تورک اويماقلاريندان بيرينه باغلی اولوب، 1238 دولايلاريندا دوغدوغو سؤیله نیرسه ده کسگين دئیيلدير....

آردی

+آرتیردی 88/11/20ساعات1:58 داملا |

اوزومه گؤزلریم

اوزومه گؤزلریم آسیت یاغدیریر

آستاجا چورویور ، یانیر ، تؤکولور

تانرینین الینده توخونان اوزلوک

زامانلا ایلمه یی قاچیر ، سؤکولور

بیلیرم بئله جه عؤمور کئچیرسم

باخان اولمایاجاق اوزومه ساری

بیر اوزلوک توخویون شعردن ، قزلدن

دلی لر اوزومه باخسینلار باری !

+آرتیردی 88/10/24ساعات23:15 داملا |

یئنی وئبلاگ

تاریخ، ادبیات و فولکلور ساحه سینده چالیشان وئبلاگ ایشه باشلادی.

http://www.uluulus.blogfa.com

+آرتیردی 88/10/18ساعات23:10 داملا |

قاپیمین آغزینا سو چیله میشم

ایسته سن بو آخشام گؤروشومه گل

باخما شه هریمین سویوق قیشینا

قوجاغیم سیجاقدیر، سن اوشومه، گل

یوردومون توپراغی دوزلاق دا اولسا

ایزلرین یوللاردا چیچکلنه جک

قارانلیق گئجه ده گؤروشسک ، گؤیدن

اولدوز النه جک، نور النه جک

گؤیومه چوخ گؤرمه کیپریکلرینی

دئه نئجه اوچسونلار یازیق سئرچه لر

بیر آز دا گئجیکسن، یوبانسان، اینان

اورک آدلی یارام شیشر، دیرچه لر

دنیزدن آیریلان، کویره دوشن

اؤلمک اوزه ره یم سونالار کیمی

نه اولور بو آخشام گل گؤروشومه

قوی باغرینا کؤچوم دورنالار کیمی

قاپینین آغزینا سو چیله نیبدیر

گل، بیزده بیریسی سنی گؤزله ییر

اللری سویوقسا، اوره یی سیجاق

تبریزده بیریسی سنی گؤزله ییر

+آرتیردی 88/10/05ساعات18:50 داملا |

یاغیش تؤرنی

^{یازار: محمدرضا خیری فام}

^{قوراقلیق اولان ایللرده بیناب شهرینده گؤزونو گؤیه تیکن اینسانلارین اومودلاری کسیلدیکده ، اونلار یاغیش آشی بیشیرمه لی اولدوقلارینی دوشونوردولر.}

^{محله قادینلاری هره سی بیر قاب ایله قاشیق گؤتوره رک بیر یئره توپلاشیب سونرا محله کوچه لرینده قاشیقلا قابین دالینا ووراراق بیرلیکده « چؤمچه چؤم اوسته، آللاهدان یاغیش ایسته» دئیه رک، قاپیلاری دؤیوب آش اوچون دن- دوش ییغیردیلار. سونرا یئنه بیرلیکده تونقال قالاییب اود یاندیریب آشی بیشیریب بوتون قاپی -قونشولارا پایلاییردیلار. بو آرادا اوشاقلار دا تؤرنین ایلکیندن سونونا دک قادینلارین یانیندا اولوردولار.}

^{من بو تؤرنی 28-23 ایل بوندان اؤنجه گؤرموشدوم. چوخ آجیناجاقلی دیر کی، او چاغ کیچیک یاشلی اولدوغوم اوچون یالنیزجا بو قدرینی آنیرام. چوخ گومان کی، بو فولکلوریک تؤرن ده، چوخلو باشقا تؤرنلریمیز کیمی آرتیق آرادان گئدیب، یالنیزجا منیم کیمی لرین یادداشیندا قالیب دیر.}

+آرتیردی 88/09/24ساعات23:53 داملا |

آخشام اوستو

ائله یورغون گلیر بیر قادین ...

آیاقلاریندا ییرمی بیر عصرین قاباری

کیپریکلرینین آلتیندا گیزلی بیر سئودانین خوماری

و ساچلاریندا

یئنه آنا

قادین توماری!

آخشام اوستو

تاماشایا گلیر بوتون شه هر

بیر هئیکل

یئریمه یه باشلاییب خییاوانلاردا!

+آرتیردی 88/09/16ساعات12:21 داملا |

بو گون اللریمده

بو گون اللریمده دوغولاجاقدی

دونن گؤزلریمده سولان او چیچک

بلکه هئچ یوخ ایدی بیر خیال کیمی

بلکه یالان ایدی، یالان، او چیچک

گئجه لر آغلادی قولاق لاریمدا

بارماق لاری گزدی دوداقلاریمدا

ساچ لاری اوخشادی بارماق لاریمدا

یوخوسو گؤزومه دولان او چیچک

بیر آندا بوی آتدی، دیندی، یئریدی

بیر آندا بوز اولدو الده اریدی

بیلمیرم بلکه ده هله دیری دی

قوخوسو باخچادا قالان او چیچک

هر نه یی بیراخدی، هر زادی آتدی

او منیم ایچیمدن تانرییا چاتدی

« داملا » دان قورتولوب، دنیزه باتدی

بیر منی ، منیمدن آلان او چیچک

+آرتیردی 88/09/09ساعات17:24 داملا |

یوکلندی اوستومه بیر اتک دومان

نیسگیلی ، آرزونو ، کاشی گؤرمه دین

سئودین گؤزلریمی آما هئچ زامان

اییلیب گؤزومده یاشی گؤرمه دین .

گلیب گئدن دئدی عاییبدیر ، عاییب

بو دورو سئوگینی بؤیوک سوچ ساییب

هره سی بیر داشی منه توللاییب

باشیما چیرپیلان داشی گؤرمه دین .

آیریلیق قوخودو گؤروشلریمیز

همیشه یوباندین ، قالدیم کیمسه سیز

تاوانین چکیریک ایندی ایکیمیز

اؤتن چاغی ، عؤمرو ، یاشی گؤرمه دین .

اوچدوم گؤزلرینه دمیر قفسله

گؤنلونو ایسیتدیم یاز تک نفسله

شعریمی اوخودوم ایسسی بیر سسله

الیمی اوشودن قیشی گؤرمه دین

ایندی شعر یازیرام دیلیم یاشاسین

« داملا » اولموشام کی سئلیم یاشاسین

آرتیق سن یاشاما ، ائلیم یاشاسین !

سن کی ، بو اوجالان باشی گؤرمه دین !....

+آرتیردی 88/09/09ساعات17:14 داملا |