تبليغاتX
داملالار - Bir gün daha

داملالار
.:.داملالار وئبلاگینا خوش گلمیشسینیز.:.
Bir gün daha

 

بير گون داها

بير آي داها

زامان يئل كيمي اسير

حايات داوام ائله يير هله

گونش دوغولور

سولار آخير

آنامين سماوري جوشور هر سحر

باغچاميزدا گوللر ياشايیش قوخويور

آتام يوخدور آرتيق حاياتدا

تام 11 آي اولدو كؤچوب گئتمه سي

اما حايات داوام ائله يير هله

آیهان دوغولدو دونيالار بزه يي

بالاجا شيرين اوغلان

معصوم باخيشلاري بيرفينجان سيجاق سوته بنزه یير

آنا قوخويور

ياز ياغيشي تك يوموشاق دير اينجه جيك وجودو

گوزله ري اومود پوسگورور دونياميزا

يارين لار آيدين سنه گولوم!

گورورسن !

حايات داوام ائله يير سئوگيليم

قارغالار قاريلدايیر پنجره مين اؤنونده كي آغاجدا

قاریشقالارين يوواسينا سو دولور

تورآتانلار دورمادان تور توخويور

باغداددا بير بمب داها پارتلادي

اور ه يي آغريدي مي قارغالارين ؟!

قيزيل حيصاردا 13 كيشي آسيلدي

هه قاریشقالارين يوواسينا سودولدو

تهراندا بير قادين اؤزونو اودلادي

آلووو تور آتانلارين تورونو يانديرديمي ؟

اينسانليغين كيلوسو نئچه دير 21- جي عصريده

بورادا لعنته اولاسي اؤلكه ده ؟

نه دهشت دير حايات

قورخورام!

بوتون پنجره لري باغلايیب

آغلاماق ايسته ييره م اوموزلاريندا

ساريل منه اومود پيچيلدا قولاقلاريما

ساچلاريما توخون

اؤپ سونرا اونود

و بوراخ زامانين گوموش توزو اوتورسون ساچلاريما

حايات داوام ائله سين

يئل كيمي اسسين زامان

بير گون داها

بير آي داها...

 شعر : زینب حسن زاده

+آرتیردی 89/06/06ساعات18:27 داملا |